ዲ.ዩ ሚያዝያ 24/2016 ዓ/ም (ህ.ዓ.ግ)፦ በዲላ ዩኒቨርሲቲ የማህበረሰብ አገልግሎትና አጋርነት ዳይሬክቶሬት አዘጋጅነት ለወናጎ የሥነ-ህዝብ ማዕከል ሠራተኞች በመረጃ አሰባሰብ ዘዴዎች ዙሪያ ስልጠና ሰጥቷል።
አቶ ትዝአለኝ ተስፋ፣ የዲላ ዩኒቨርሲቲ ጤና ሳይንስ ኮሌጅና አጠቃላይ ሆስፒታል ዋና ስራ አስፈፃሚ በመክፈቻ ንግግራቸው፤ የዲላ ዩኒቨርሲቲ በጤና ሳይንስ ኮሌጅ በማህበረሰብ አገልግሎት እይታ በርካታ ስራዎች እየሰራ እንደሚገኝ አስረድተው፤ በወናጎ የስነ ህዝብ እና ጤና ቅኝት የምርምር ማዕከል የሚሰራው ስራ አንዱ እንደሆነ ገልጸዋል።
በሥነ ህዝብ ማዕከሉ የማህበረሰቡን የሚመለከቱ መረጃዎች መሰብሰብ መቻሉ በዋናነት የማህበረሰቡን ችግር ሳይንሳዊ በሆነ መልኩ እንዲፈታ መነሻ እንደሚሆን አቶ ትዛለኝ አያይዘው ገልፀዋል፡፡
ምስጋኑ ለገሰ (ዶ/ር)፣ የምርምር፣ ህትመት፣ ስነ ምግባርና ስርፀት ዳይሬክተር በበኩላቸው፤ ውጤታማ የሆነ ስራ እንደሃገር ለመስራት የሚወሰኑ ውሳኔዎችና የሚዘጋጁ ፖሊሲዎች ዳታን መሰረት አድርገው መሆኑን አስረድተው እያንዳዱ ዳታ ሰብሳቢ የሚያበረክተው አስተዋጽኦ በጣም የተለየ መሆኑን ገልጸዋል።
አቶ አበበ እጅጉ፣ የወናጎ ወረዳ አስተዳዳሪ በተለያዩ ጉዳዮች ማህበረሰቡ ውስጥ ለጤና ጠንቅ የሆኑ ችግሮች በጋራ ከተለያዩ ባለድርሻ አካላት ጋር በመሆን በጥናት አስደግፎ መረጃዎችን በማሰባሰብ ራሱን አስችሎ መረጃ የሚያሰባስቡ ሠራተኞችን በማሰልጠን ድጋፍ እያደረገ መሆኑ ውጤትም የሚያስገኝ መሆኑን አንስተዋል።
በስልጠናው የመዝጊያ ንግግር ያደረጉት የዩኒቨርሲቲው የምርምርና ቴክኖሎጂ ሽግግር ም/ፕሬዝዳንት ጽ/ቤት ኃላፊ ዶ/ር አለማየሁ አካሉ፣ ማዕከሉ ሲመሰረት በወናጎ እና አካባቢው በተለይ በጤናና ስነ ህዝብ ጋር ተያያዥ የሆኑ ጉዳዮች ላይ ችግሮችን ከመፍታት ባለፈ በአገር አቀፍም ደረጃ በእዚህ ዙሪያ ላይ ለሚሰሩ ስራዎች የሞዴል መሆን የሚችል ማዕከል መመሰረት ያስችላል የሚል ሃሳብ ተይዞ እንደነበር አስታውሰው ማዕከሉን ስራ ለማስጀመር የመጀመሪያው ምዕራፍ መሆኑን ገልጸዋል።
ዶ/ር አለማየሁ፤ አክለው ዩኒቨርሲቲው ስራዎችን የሚመራ ተቋም እንደመሆኑ የሚያስፈልጉትን የሰው ኃይል የማሟላት፣ ግብዓት የማቅረብ ኃላፊነቱን ወስዶ እየሰራ ያለ መሆኑን አንስተው፤ መረጃ ሰብሳቢ ባለሙያዎች መረጃን በጥራት የመሰብሰብ ኃላፊነት እንዳለባቸው አሳስበዋል።
ስልጠናውን የሰጡት አቶ አልአዛር ባህሩ በአርባ ምንጭ ዩኒቨርሲቲ ስነ ህዝብ እና ጤና ክትትል ምርምር ማዕከል ዳታ ማናጀር፤ የመረጃ መሰብሰቢያ መሳሪያዎችን ማደራጀት በተመለከተ፤
ዶ/ር መኮንን ብርሃኔ በዲላ ዩኒቨርሲቲ የህብረተሰብ እና አካባቢ ጤና አጠባበቅ ት/ክፍል መምህር፣ በመረጃ አሰባሰብ ዘዴዎችና መገልገያ መሳሪያዎች ዙሪያ እንዲሁም አቶ ሀብታሙ እንዳሻው፣ በዲላ ዩኒቨርሲቲ የወናጎ ጤናና ስነ ህዝብ ክትትል ምርምር ማዕከል ኃላፊ፣ የማዕከሉን ራዕይና ተልዕኮ የስራ እንቅስቃሴ እና ስለ ጤናና ስነ ህዝብ ክትትል ምርምር ማዕከል አጠቃላይ ገለጻ አድርገዋል።
ስልጠናውን ከወሰዱ ሰልጣኞች መካከል አቶ አብርሃም ቱጂ፣ መረጃዎችን እንዴት በስርዓት መሰብሰብ እንዳለባቸውና ዳታውን እንዴት ወደ ኮምፒውተር ማስገባት እንደሚቻል ዕውቀትና ክህሎት እንዳገኙበት ገልጸውልናል።
ለተከታታይ ሦስት ቀናት የተሰጠውን ስልጠና 20 የመረጃ ሥራ አመራር ሰራተኞች መከታተላቸው ታውቋል።
ዲላ፤
የአረንጓዴው ምድር ዩኒቨርሲቲ፤
የህዝብና ዓለም አቀፍ ግንኙነት ዳይሬክቶሬት

Facebook:
https://www.facebook.com/Du.edu.et
Telegram: https://www.t.me
website: https://www.du.edu.et
Email: https://www.pirdir@du.edu.et