ዲ.ዩ፤ ሕዳር 28/2016ዓ/ም (ህ.ዓ.ግ)፦ ላለፉት አራት አመታት የዲላ ዩኒቨርሲቲ ቢዝነስና ልማት ምክትል ፕሬዚዳንት ሁነው ሲያገለግሉ የነበሩት ዮናስ ሰንዳባ (ዶ/ር) የሽኝት ፕሮግራም ተካሂዷል።

ችሮታው አየለ (ዶ/ር)፣ የዲላ ዩኒቨርሲቲ ፕሬዝዳንት በሽኝት ፕሮግራሙ ላይ ባሰሙት ንግግር፤ ዶ/ር ዮናስ በሀላፊነት ባሳለፏቸው ጊዜያት በታታሪነት፣ በቅንነትና በበቂ እውቀትና ክህሎት ተቋሙን ማገልገላቸውን ጠቅሰው፤ ዩኒቨርሲቲውን ከፍ ወዳለ ደረጃ ለማድረስ ላደረጉት አስተዋፅኦ በማመስገን በቀጣይም ከዩኒቨርሲቲው የቅርብ ቤተሰብ ሆነው ይቀጥላሉ ሲሉ ገልጸዋል።

ዶ/ር ዮናስ ሰንዳባ፣ ሽኝት የተደረገላቸው የቀድሞ የዲላ ዩኒቨርሲቲ ቢዝነስና ልማት ምክትል ፕሬዚዳንት፣ በበኩላቸው በተቋሙ በመምህርነትና በሀላፊነት በማገልገላቸው ኩራት እንደሚሰማቸው ገልጸው፤ በነበራቸው ቆይታ ዘርፈ ብዙ እውቀትና ልምድ እንዳካበቱ እንዲሁም የሀላፊነት ቆይታቸው የተሳካ የሆነው የአመራሩንና የግቢው ማሕበረሰብ ቀና ትብብርና ድጋፍ ታክሎበት መሆኑን አንስተዋል።

የዩኒቨርሲቲው ማኔጅመንት አባላት የምስጋና ምስክር ወረቀትና የማስታወሻ ስጦታ ያበረከቱ ሲሆን፤ ዶ/ር ዮናስ ለተዘጋጀላቸው የሽኝት ፕሮግራም፣ ለተሰጣቸው የምስክር ወረቀትና የማስታወሻ ስጦታ ምስጋናቸውን አቅርበዋል።