ዲ.ዩ፤ ሕዳር 30/2016 ዓ/ም (ህ.ዓ.ግ)፦ ዲላ ዩኒቨርሲቲ የ2016 የትምህርት ዘመን አዲስ ገቢ መደበኛ ተማሪዎችን በሰላም ተቀብሎ አጠናቆ በዛሬው ዕለት በከፍተኛ ትምህርት ተቋማት የተማሪዎች ስነ-ምግባር (ዲሲፕሊን) መመሪያ ዙሪያ የግንዛቤ ማስጨበጫ ስልጠና መስጠቱ ተገልጿል።

አቶ ሚልክያስ ኦቶሬ፣ የዲላ ዩኒቨርሲቲ አስተዳደርና ልማት ምክትል ፕሬዝዳንት ጽ/ቤት ኃላፊ፤ ስልጠናው ተማሪዎች በተመደቡበት የሙያ መስክ እንደ ሀገር ብቁ ዜጋ ሆነው እንዳይወጡ የሚያደርጉ የሥነ – ምግባር ግድፈቶችን ለማረም ታስቦ የተዘጋጀ ስልጠና መሆኑን ተናግረዋል።

የስነ ምግባር መመሪያው ከዚህ ቀደም ሲተገበር የቆየ መሆኑን ያነሱት አቶ ሚልክያስ ኦቶሬ፤ ይህ ስልጠና ወቅቱን ባገናዘበ መልኩ የተለመደውን ሰላማዊ የመማር ማስተማር ስራ ለማሳካት የሚሰጥ ስልጠና እንደሆነ ገልጸዋል።

አቶ አማኑኤል ጌካ፣ የዩኒቨርሲቲው ተማሪዎች አገልግሎት ዳይሬክቶሬት ዳይሬክተር በበኩላቸው፤ ለአዲስ ገቢ ተማሪዎች የእንኳን ደህና መጣችሁ መልእክት አስተላልፈው፤ ባለፉት ቀናት የዩኒቨርሲቲው ማሕበረሰብ፣ የተማሪዎች ሕብረትን ጨምሮ የተለያዩ የተማሪ አደረጃጀቶች፣ የአካባቢውና የፌዴራል ፀጥታ ኃይሎች ባደረጉት የጋራ ትብብር ተማሪዎች ወደ ግቢው በሰላም መግባታቸውን ገልጸዋል።

ስልጠናውን የሰጡት አቶ አዲስ ታምሩ፣ የሕግ ትምህርት ክፍል መምህርና የዩኒቨርሲቲው የሕግ አገልግሎት ዳይሬክተር፤ ስልጠናው በዋነኝነት የከፍተኛ ትምህርት ተቋማት የተማሪዎች የዲሲፕሊን መምሪያና የተቋሙ ሌጅስሌሽንን ታሳቢ በማድረግ የተዘጋጀ እንደሆነ ተናግረው፤ በተቋሙ ሰላማዊ የመማር ማስተማር ሂደትን ማስቀጠልን አላማ ያደረገ መሆኑን አጽንኦት ሰጥተው ገልጸዋል።

በስልጠናው ተማሪዎች በግቢ ውስጥ በሚኖራቸው ቆይታ ሊከተሏቸው የሚገቡ የስነ ምግባር መርሆዎች ምን ምን እንደሆኑ፤ እንዲሁም የሥነ ምግባር ግድፈቶች ምን ዓይነት ቅጣት ሊያስከትሉ እንደሚችሉ ተዳሷል።

በስልጠናው የመጀመሪያ አመት ትምህርት ቆይታቸውን በተመለከተ አቶ መንግሥቱ ተሾመ፣ የፍሬሽ ማን ጽህፈት ቤት ዲን ተወካይ ገለጻ ያደረጉ ሲሆን፤ ምዝገባን፣ ውጤትን፣ መታወቂያን እና ሌሎች ተያያዥ ጉዳዮችን በተመለከተ ደግሞ የዩኒቨርስቲው ሬጅስትራርና አልሙናይ ዳይሬክቶሬት ምክትል ዳይሬክተር በአቶ አብርሃም አበበ ለተማሪዎች ገለጻ ተደርጓል።