ዲ.ዩ፤ ጥር 29/2016 ዓ.ም (ህ.ዓ.ግ)፦ በኢትዮጵያ የስቴም ፓወር ካንትሪ ዳይሬክተር በዲላ ዩኒቨርሲቲ የስቴም ማዕከል ተገኝተው በማዕከሉ የተከናወኑ ተግባራትን ምልከታ አድርገዋል።
በዲላ ዩኒቨርሲቲ ፕሬዝዳንት ዶ/ር ችሮታው አየለ የተመራው የዩኒቨርሲቲው ከፍተኛ አመራሮች እና የኢትዮጵያ ስቴም ፓወር አባላት ቡድን በዩኒቨርሲቲ ስቴም ማዕከል እየተከናወኑ ያሉ ተግባራትን ምልከታ ያካሄደ ሲሆን በምልከታውም ፕሬዝዳንቱ እንደገለጹት፤ የስቴም ፓወር ካንትሪ ዳይሬክተር በተገኙበት በዩኒቨርሲቲው ስቴም ማዕከል የተደረገው ምልከታ ከዚህ ቀደም ዩኒቨርሲቲው ከስቴም ፓወሩ የተለያዩ እገዛዎችን ሲያገኝ ስለነበር በዛ መነሻነት እስካሁን በማዕከሉ የተሰሩ ስራዎች ምን እንደሚመስሉ ለማየትና እንዲሁም ዩኒቨርሲቲው በአገር አቀፍ ውድድሮች ያሸነፍንባቸውን የፈጠራ ስራዎች ለመመልከት ነው ሲሉ ተናግረዋ
በጉብኝቱ ወቅትም ካንትሪ ዳይሬክተሩ በማዕከሉ ያሉትን የግብአት ችግሮች በማሟላት እገዛ ለማድረግ ቃል መግባታቸውን ዶ/ር ችሮታው አያይዘው ገልጸዋል።
ዶ/ር ችሮታው አክለውም፤ ዩኒቨርሲቲው በቀጣይ ከስቴም ፓወር ጋር ያለውን ግንኙነት ይበልጥ በማጠናከር የተሻሉ ተማሪዎችን በማፍራት በሀገሪቷ ቀጣይ ስራ ፈጣሪ ትውልድ ለመፍጠር እንደ ተቋም ትልቅ ጥረት እንደሚደረግ ተናግረዋል።
ስሜነህ ቀስቅስ (ዶ/ር)፣ በኢትዮጵያ የስቴም ፓወር ካንትሪ ዳይሬክተር በበኩላቸው፤ የዛሬው ምልከታ በዋናነት በስቴም ማዕከሉ እየተሰሩ ያሉት ስራዎች ምን እንደሚመስሉ ለማየትና ምናልባት እገዛ የሚፈልጉ ነገሮች ካሉም እዚህ ላይ እንደሚሰራ አንድ አካል እና ይህን ማዕከል እንዳቋቋመ እንደ አንድ ድርጅት ምን ላይ መርዳት እንችላለን የሚለውን ለመምከር እንደሆነ ገልጸዋል።
ካንትሪ ዳይሬክተሩ በምልከታቸውም፤ ማዕከሉ ጥሩ ስራዎችን እየሰራ እንደሚገኝ መመልከታቸውንና ለዚህ ደግሞ በየዓመቱ ከዚህ ማዕከል የሚወጡ ልጆች በአገር አቀፍ ደረጃ ጭምር አንደኛ በመውጣት ተሸላሚ መሆናቸው ለዚህ አንዱ ማሳያ ምስክር መሆኑን ተናግረዋል።
ይህን ማዕከል ከዚህ በተሻለ ቢደራጅ ምናልባትም ዞኑ ላይ በርካታ ልጆች ብዙ ችግር ፈቺ ፕሮጀክቶችን ይዘው መምጣት ይችላሉ ብለው እንደሚያምኑ አንስተዋል። እዚህ ላይ ለመስራት ከኃላፊዎች ጋር ስምምነት ላይ መደረሱን ዶ/ር ስሜነህ አያይዘው ተናግረዋል።
ዶ/ር ስሜነህ አክለውም፤ በዲላ እና አካባቢው ያሉ የሁለተኛ ደረጃ እና የመጀመሪያ ደረጃ ት/ቤት ተማሪዎችም ይህ ትልቅ ማዕከል በአቅራቢያቸው መኖሩን አውቀው በክረምት እንዲሁም በቅዳሜ እና እሁድ መርሃ ግብሮች መጥተው በመጠቀም በሳይንስና ቴክኖሎጂ መስኮች ላይ ያላቸውን ዕውቀት እንዲያዳብሩ ጥሪ አስተላልፈዋል።
ከምልከታው የተገኙ ጠንካራና መሻሻል የሚገባቸው ጉዳዮች ተነስተው የተለያዩ የመፍትሄ አቅጣጫዎች እንደተሰጠባቸው ለማወቅ ተችሏል።
