ዲ.ዩ ግንቦት 14/2016 ዓ/ም (ህ.ዓ.ግ)፦ የዲላ ዩኒቨርሲቲ የምርምርና ቴክኖሎጅ ሽግግር ምክትል ፕሬዝዳንት ዘርፍ በአቅራቢያው ከሚገኙ የኢንዱስትሪ ተቋማት ጋር በጋራ ለመስራት የመግባቢያ ሰነድ ተፈራርሟል፡፡
የዲላ ዩኒቨርሲቲ የምርምርና ቴክኖሎጅ ሽግግር ምክትል ፕሬዝዳንት ሀብታሙ ተመስገን (ዶ/ር) እንደገለጹት፤ በተለይ በትብብር የሚሰሩ ስራዎች ለዩኒቨርሲቲ- ኢንድስትሪ ተቋማት ግንኙነት ወሳኝ መሆኑን ገልጸው፤ ዩኒቨርሲቲው ከኢንዱስትሪ የሚወስዳቸው ልምድ ያላቸው ባለሙያዎች መኖራቸውን ገልጸው፤ የተፈጠረው ትስስር የሚፈልጋቸውን ክህሎቶች መምህራንን በመላክ ማሰልጠንና ማብቃት እንደሚያስችል ተናግረዋል።
ዶ/ር ሀብታም አያይዘው፤ የዩኒቨርሲቲና የኢንዱስትሪ ትስስርን ማረጋገጥ የምናሰለጥናቸው ተማሪዎች ላይ ያለው ፋይዳ ትልቅ ነው ሲሉ አንስተው፤ ይህንን ለማሳካት ከተቋማት ጋር የመግባቢያ ሰነድ መፈራረም አስፈላጊ ሆኖ መገኘቱን አስገንዝበዋል፡፡ ዩኒቨርሲቲው በተሰጠው የትኩረት አቅጣጫ ላይ ለመስራት የኢንደስትሪው አቅም አስፈላጊ መሆኑን አያይዘው ገልጸዋል።
አቶ ዳንኤል ተሾመ፣ የቀባዶ ቴክኒክ እና ሙያ ትምህርት ስልጠና ኮሌጅ ዲን በበኩላቸው፤ በከፍተኛ ትምህርት ተቋማትና ቴክኒክና ሙያ ትምህርት ስልጠና ኮሌጆች በጋራ የሚሰሩት ብዙ ስራ እንዳላቸው እና ለዚህም በቴክኒክና ትምህርት ስልጠና ኮሌጅ ፖሊሲ እና እስትራቴጂ ላይ የተቀመጡ የትብብር አይነቶች እንዳሉ ገልጸው፤ የተለያዩ የሙያ ስልጠናዎችን ሲሰጡ የሚኖሩ የክህሎት ክፍተቶችን መሙላት የሚቻለው ከከፍተኛ ትምህርት ተቋማት ጋር በመተባበር እንደሆነ ተናግረዋል።
አቶ ሀብታሙ አለማየሁ፣ የዲላ ፖሊ ቴክኒክ ኮሌጅ ዲን በተመሳሳይ፤ በዋናነት ዩኒቨርሲቲውና ኮሌጁ በጋራ ተቀናጅተው ለመስራት የሚያግዝ የመግባቢያ ሰነድ መፈራረማቸውን ገልጸው፤ ዩኒቨርሲቲው ያለውን ትልቅ አቅም ተጠቅመን የምርምር እና የቴክኖሎጅ ሽግግር ስራዎችን በጋራ ለመስራት ያግዘናል ሲሉ አስረድተዋል።
የጋራ መግባቢያ ሰነዶቹ የፊርማ ስነ ስረዓትም የሶስቱ ተቋማት የተለያዩ አመራሮች በተገኙበት በዲላ ዩኒቨርሲቲ ተከናውኗል።
ዲላ፤
የአረንጓዴው ምድር ዩኒቨርሲቲ፤
የህዝብና ዓለም አቀፍ ግንኙነት ዳይሬክቶሬት

Facebook:
https://www.facebook.com/Du.edu.et
Telegram: https://www.t.me
website: https://www.du.edu.et
Email: https://www.pirdir@du.edu.et